Kryetari i Bashkimit Demokratik për Integrim (BDI), Ali Ahmeti, u ka bërë thirrje të gjitha partive politike në Maqedoni, që ta njohin rezultatin e zgjedhjeve lokale.
Në një intervistë për gazetën “Epoka e re”, Ahmeti ka thënë se Maqedonia ka nevojë për stabilitet, që institucionet të punojnë për realizimin e reformave dhe integrimin e vendit në NATO.
Ai ka theksuar se zgjedhjet lokale treguan se BDI-ja është subjekti më i besueshëm i shqiptarëve të Maqedonisë.
Ahmeti ka thënë se shqiptarëve në Maqedoni nuk u duhen më shumë se dy parti politike.
“Ekzistenca e shumë partive po i dëmton shqiptarët në Maqedoni. Ne nuk jemi shumë për t’u ndarë”, është shprehur Ahmeti, duke shtuar se partitë e vogla shqiptare duhet të bëhen bashkë dhe të krijojnë një opozitë serioze për t’u përballur me BDI-në.
