Sot, KAB STRUGA kremtoi 8-vjetorin e themelimit të tij, një moment krenarie dhe reflektimi për të gjithë ata që e duan natyrën dhe vendin ku jetojnë. Festa u mbajt në një nga mrekullitë natyrore që rrethojnë Strugën — liqenet e Llabunishtit dhe Podgorcit — ku më shumë se 100 dashamirës të natyrës u bashkuan për të shënuar këtë përvjetor të veçantë.
Atmosfera ishte e ngrohtë dhe miqësore, plot me energji pozitive dhe dashuri për natyrën. Pjesëmarrës nga qytete të ndryshme, si Kumanova, Tetova dhe Shkupi, udhëtuan enkas për të qenë pjesë e këtij momenti domethënës, duke i dhënë kësaj dite një karakter të veçantë dhe gjithëpërfshirës.
Ndër momentet më të bukura të ditës ishte praninë e vogëlushëve, të cilët me buzëqeshjen dhe gjallërinë e tyre i dhanë jetë dhe ngjyra festës. Ata janë simboli më i bukur i asaj çfarë KAB STRUGA synon të kultivojë: dashurinë për natyrën dhe respektin për të që në moshë të vogël.
Ky përvjetor nuk ishte thjesht një festë — ishte një dëshmi e punës së palodhur që kryesia e klubit ka bërë përgjatë këtyre tetë viteve, duke promovuar natyrën, turizmin ekologjik dhe qytetin e bukur të Strugës.
Me mbështetjen e shoqatave mike si Shoqata Klubi Bjeshkatar KUMANOVA, Sytë e Sharrit, dhe SHBE Shkupi, festa u shndërrua në një bashkim zemrash që ndajnë të njëjtin pasion.
