Abazi priti ambasadorin Rokas, bashkëpunimi me BE-në vazhdon të thellohet në të mirë të komunës
Kryetari i Bogovinës, Feti Abazi ka pritur në hapësirat e komunës ambasadorin e BE-së në vend, Michalis Rokas.
Në kuadër të takimit janë prekur tema me rëndësi për zhvillimin e komunës, si dhe prioritetet gjatë mandatit katërvjeçar të kreut të Bogovinës.
“Shprehim falënderimin tonë të sinqertë për ambasadorin e Bashkimit Europian, Sh.T.Z. Michalis Rokas, për kohën dhe përkushtimin që ndau një ditë të tërë për vizitë në Komunën e Bogovinës. Njëkohësisht e falënderojmë për përkrahjen e vazhdueshme të Bashkimit Europian ndaj projekteve që kontribuojnë në zhvillimin e komunës sonë. Gjatë vizitës, ambasadori zhvilloi takim me mua si kryetar i Komunës së Bogovinës me Këshillin e Komunës, si dhe pati një takim të frytshëm me përfaqësues të shoqërisë civile. Poashtu është vizituar edhe një projekt i përkrahur nga BE-ja, i cili është një dëshmi konkrete e mbështetjes dhe partneritetit tonë të përbashkët”, ka thënë Abazi.
Sipas tij, prioritete kryesore mbeten zgjidhja e problemeve me ujin e pijshëm, zhvillimi i turizmit malor dhe përkrahja e bizneseve lokale, me qëllim krijimin e një ekonomie më të qëndrueshme dhe rritjen e mirëqenies për qytetarët tanë.
“Shpresojmë që ky bashkëpunim i shkëlqyer me Bashkimin Evropian të vazhdojë dhe të thellohet edhe më tej në të ardhmen, në të mirë të Komunës së Bogovinës dhe qytetarëve të saj”, thekson Abazi.
