Ali Ahmeti ngre alarmin në Kuvendin e BDI-së: Rrezikohet Marrëveshja e Ohrit, akuza për presion politik ndaj ish-krerëve komunalë

Në komunën e Likovës është mbajtur mbledhja e katërt e Këshillit të Përgjithshëm të Bashkimi Demokratik për Integrim, ku në fokus kanë qenë zhvillimet e fundit politike në vend dhe organizimi i brendshëm partiak.
Kryetari Ali Ahmeti ka ngritur shqetësimin për, siç u shpreh, tendencat për “grryerjen” e Marrëveshjes së Ohrit, duke paralajmëruar se cenimi i saj mund të ketë pasoja serioze për stabilitetin e vendit dhe rrugën drejt integrimit në Bashkimi Evropian. Ai bëri thirrje për respektim të plotë të marrëveshjes si bazë e paqes dhe bashkëjetesës.
Në mbledhje u theksua gjithashtu se po rritet presioni politik ndaj ish-kryetarëve të komunave nga radhët e BDI-së, duke përmendur rastet e Blerim Bexheti dhe Fatmir Dehari. Nga kjo parti u theksua se mbështetet kontrolli institucional dhe transparenca, por kundërshtohet ashpër, sipas tyre, drejtësia selektive dhe e motivuar politikisht, si në rastet e Sarajit dhe Kërçovës.
BDI ka shprehur qëndrime edhe për zhvillimet ndërkombëtare, duke theksuar ndikimin e proceseve politike në Evropë, veçanërisht në Hungari, si dhe duke shprehur shqetësim për tensionet në Lindjen e Mesme.
Në këtë kontekst, u ritheksua mbështetja për rolin e Shtetet e Bashkuara të Amerikës si partner strategjik në ruajtjen e stabilitetit global, me apel që zgjidhjet të arrihen përmes dialogut dhe jo përmes përshkallëzimit të konflikteve.
Mbledhja u mbyll me raportimet e strukturave lokale të partisë, ndërsa u paralajmërua vazhdimi i proceseve të brendshme organizative, që pritet të sjellin përbërje të reja në nivelet drejtuese.