Ohër dhe Strugë, 31 Korrik 2025 – Një natë e rëndë për rrugët e rajonit jugperëndimor, ku dy aksidente të ndara kanë lënë të lënduar rëndë dy të rinj, njëri si këmbësor dhe tjetri si drejtues mjeti.
Sipas informacioneve zyrtare nga Sektori për Punë të Brendshme i Ohrit, aksidenti i parë ka ndodhur në orën 21:05 në bulevardin “Turistike” në Ohër. Një automjet i tipit “Daihatsu” me targa të Shkupit, i drejtuar nga 69-vjeçari S.G. nga Shkupi, ka goditur një këmbësor të mitur nga Ohri. Fëmija ka pësuar lëndime të rënda trupore, të konstatuara në Spitalin Special “Shën Erazmo” në Ohër.
Aksidenti i dytë është regjistruar vetëm një orë më pas, rreth orës 22:10, në rrugën lokale në fshatin Ladorisht të Strugës. Një veturë e tipit “Golf” me targa të Strugës, ka dalë nga rruga. Si pasojë, shoferi i ri ka marrë lëndime të rënda, ndërsa pasagjeri i tij nga fshati Zagraçan ka shpëtuar me lëndime të lehta. Të lënduarit janë dërguar për trajtim mjekësor në spitalet e Ohrit dhe Strugës.
Në të dyja rastet, hetimet në vendngjarje janë kryer nga ekipet e Sektorit për Punë të Brendshme në Ohër, ndërsa policia po punon për të sqaruar shkaqet që çuan në këto aksidente.
