Partitë kanë ndezur motorrët e ‘shirje-korrjeve’ 20 ditëshe. Gati të gjitha, pa përjashtim, merren me politikë të ‘madhe’, sikur anashkalojnë njeriun e ‘vogël’. Atë që më 15 tetor do t’ua pres teshat…
Shkruan: Seladin XHEZAIRI
Këto zgjedhjet që po na trokasin kujtoj se do të mbahen mend për pak gjëra, por që kryeprotagonistë kanë shqiptarët. Në shkallë vendi. Shikonie VMRO-DPMNE-në: edhe ajo e gjeti një Muhamed për të bërë gara nën siglën e ‘partisë më maqedonase’. Sa për t’i thënë LSDM-së se nuk mund të mburret me të ‘vetin’. Që të dyja partitë kanë lëshuar grepin për peshq të mëdhenj! Nikola Gruevski ia ka mësyer Prishtinës, ditën, njësoj si Zoran Zaevi – Tiranës – natën. I pari për t’na folur natën e i dyti – ditën…
Partitë politike shqiptare, pos që vendosin e ri-konsolidojnë krushqitë me dy të mësipërmet – maqedonase, janë hedhur në një garë goxha të çuditshme – për gratë! Njëra i ‘gjuan’ ato – pa shami, me demek t’u bëhet qejfi ndërkombëtarëve, ndërsa tjerat – të gjejnë ndonjë – ‘me shami’ – për t’ua mbyllur gojën – të parëve!
‘Pehlivaniadë, herë feudale, herë komuniste, herë kovertite pluraliste’, do të shkruante i madhi Teki Dervishi.
Dhe, çuditërisht të gjithë, ama të gjithë, përbetohen për ‘fe e atdhe’: në emër të sigurimit të votes, çirren e bërtasin deri n’kupë t’qiellit, etiketojnë e skualifikojnë – pa hesap, qofshin ‘demokratë’, qofshin ‘komunistë’, qofshin ‘fetarë’, qofshin ‘ateistë’.
Sikur harrojnë se është gjynaf, se nuk është e ndershme. Pa çka se është kohë fushate!
Njeriu, qytetari, të cilit i kërkohet a i lypet vota, duhet të bindet për vërtetësinë e ofertës dhe realizimin e saj. Ai pret reflektim të politikanëve për përgjegjshmërinë. Pret llogaridhënie! Njeriu, qytetari votues, do të duhej të ishte ai që ditën e zgjedhjeve do të shqiptonte dënimin për mospërmbushjen e zotimeve dhe, konform kësaj, do të nderonte ata që i dalin zot punës!
Në këso rastesh, do pranoni, nuk do flitnim për blerje votash, por për respektim të standardeve!
Do të flisnim për demokratë e jo për titistë, enveristë, gjylenistë apo erdoganistë!
Dhe, Evropën e shumëdëshiruar do ta kishim më pranë! Si thoni?
