Doli në botim libri më i ri nga Prof. Hiqmet Kica, me titull “Drimkolli i Strugës”. Ky libër ofron një tablo të plotë mbi zhvillimin evolutiv të mjedisit natyror, gjeografik dhe jetësor të Drimkollit. Duke pasur parasysh pozicionin e favorshëm gjeostrategjik dhe pasuritë e shumta natyrore, konstatohet se ky rajon ka kushte të përshtatshme për zhvillim optimal e universal ekonomiko-shoqëror dhe për një jetë më të sigurt e të lumtur.
Studimi kompleks i kësaj hapësire mund të favorizojë gjithashtu përhapjen gjeografike të popullsisë dhe ndryshimet në strukturën demografike. Shkrimi i kësaj monografie paraqet një ndihmesë modeste në studimet e mëtejshme për këtë trevë, si dhe do t’i ndihmojë lexuesit të plotësojnë dhe zgjerojnë njohuritë e tyre në këtë fushë. Libri është i ilustruar me material të pasur, i cili ndihmon në përcjelljen e tekstit të tij.
Me këtë rast, autori i përcjell përshëndetje lexuesve seriozë dhe dashamirës, duke mirëpritur mbresat e tyre, me qëllim të ngritjes së nivelit shkencor të kësaj monografie.
