Ohër, 21 qershor 2025 – Nga sonte do të hapet për qarkullim për të gjitha mjetet rruga nga Podmolli deri në Ohër, pjesë e autostradës Kërçovë–Ohër, njofton Ministria e Transportit.
Me këtë rast, zëvendëskryeministri dhe ministri i Transportit Aleksandar Nikolloski, së bashku me drejtorin e Ndërmarrjes Publike për Rrugët Shtetërore Koce Trajanovski, kanë inspektuar sot punimet në këtë segment.
“Sipas konstatimeve, ndërtimi i autostradës po zhvillohet sipas dinamikës së dakorduar, pavarësisht problemeve të shumta në të kaluarën. Ndërtimi i autostradës Ohër–Kërçovë ishte tërësisht i bllokuar gjatë kohës së qeverisjes së LSDM-së dhe BDI-së, për plot 7 vite nuk u punua fare. Me ardhjen e VMRO-DPMNE-së në pushtet, punimet kanë nisur me intensitet të plotë dhe pritet që deri në fund të vitit 2026 të përfundojë i gjithë aksi Ohër–Kërçovë,” thuhet në njoftimin e Ministrisë.
Segmenti Podmoll–Ohër ka qenë i mbyllur për qarkullim për shkak të punimeve sipas një regjimi të përkohshëm të trafikut, ndërkohë që qarkullimi është zhvilluar përmes rrugës së vjetër rajonale.
