Në studimin më të fundit mbi lumturinë globale, Maqedonia u rendit në vendin e fundit në Ballkan, si një nga vendet më të palumtura në rajon. Sipas rezultateve, qytetarët e Maqedonisë janë ndër më pak të kënaqurit në Ballkan, ndërsa Sllovenia fqinje kryeson listën, duke u renditur ndër 20 vendet më të lumtura në botë.
Studimi, i cili mat aspekte të ndryshme të lumturisë së jetës, si gjendja ekonomike, liria, shëndetësia dhe mbështetja sociale, tregon se qytetarët e Maqedonisë përballen me sfida serioze në përditshmërinë e tyre, gjë që ndikon në nivelin e tyre të kënaqësisë me jetën. Në të kundërt, Sllovenia, me kushtet e saj të qëndrueshme ekonomike dhe mbështetjen e lartë shoqërore, renditet ndër vendet me indeksin më të lartë të lumturisë.
Rezultatet e këtij studimi theksojnë edhe një herë nevojën për reforma dhe përmirësimin e kushteve të jetesës në Maqedoni, të cilat mund të ndihmojnë në rritjen e nivelit të lumturisë dhe kënaqësisë së qytetarëve të saj.
Evropa vazhdon të dominojë në renditjen më të fundit të lumturisë, me shumicën e vendeve të kontinentit mes 20 të parave, por jo të gjitha rajonet ndjekin të njëjtat trende. Izraeli, pavarësisht konfliktit të vazhdueshëm me Hamasin, arriti të renditet në vendin e tetë, ndërsa Kosta Rika dhe Meksika, të njohura për mikpritjen dhe optimizmin e tyre, hynë për herë të parë në top 10, duke zënë vendin e gjashtë dhe të dhjetë.
