Shoqata e Pensionistëve të Arsimit Shqip për Strugë
Informon : Resul Bekteshi
Shoqata e Pensionistëve të Arsimit Shqip për Strugë dhe Ohër më 6.03.2020 në Lokalet e Kuvendit të Komunës, mbajti takim të rregullt me të gjithë pensionistët e arsimit shqip që me dekada kanë bartur peshën e rëndë të arsimit, duke edukuar dhe arsimuar gjenerata të tëra të nxënësve shqiptarë.
Në takim u shtjelluan dhe u referuan tema që me vite dhe shekuj kanë përcjellur arsimin shqip në Maqedoninë Veriore dhe më gjërë.
Temat që u referuan ishin :
1. Roli i mësuesit shqiptar dje dhe sot, referues : Mevlur Lloga,
2. Mjetet e medias dhe roli i tyre në edukimin dhe arsimimin e nxënësve të arsimit fillor dhe të mesëm, referues : Muhamet Borova ,
3. Migrimi si fenomen në shoqërinë shqiptare, referues : Resul Bekteshi.
Në takim ishin të ftuar edhe drejtorët aktual të shkollave fillore dhe të mesme të Strugës dhe shumë përfaqësues të tjerë : pedagogë, sociologë, punëtor shkencor dhe përfaqësues nga Komuna e Strugës.
Pas referimit u zhvillua një bisedë e gjërë rreth temave që u referuan dhe kështu tubimi mori karakterin e një Tryeze të rrumbullakët.
Për nder të 7 Marsit – Ditës së mësuesit shqiptar, Kryetari i Komunes së Strugës z. Ramiz Merko në bashkëpunim me Shoqatën e Pensionistëve të Arsimit Shqip për Strugën , të gjithë pensionistëve u ndau MIRËNJOHJE për kontributin e dhënë dhe punën e tyre të palodhur në fushën e arsimit dhe edukimit të shumë gjeneratave.
Kryetari i Shoqatës së Pensionistëve të Arsimit Shqip, falenderoi Kryetarin e Komunes për ndihmën dhe përmbajtjen që jep për realizimin e programës së Shoqatës.
Kryesia e Shoqatës falënderon edhe pronarin e Kafeterisë ART Kafe për koktejin që shtroi për të gjithë pjesëmarrësit në atë eveniment kushtuar Ditës së Mësuesit.
