Katër të lënduarit në aksidentin hekurudhor afër Nogaevcit janë jashtë rrezikut për jetë. Tre janë burra dhe ata janë mbajtur në Spitalin e Velesit, ndërsa një është grua e moshës 50 vjeçare e cila për shkak të lëndimeve të marra në fytyrë është transferuar për shërim të mëtejshëm në Shkup.
Zëdhënësi i Spitalit të Përgjithshëm në Veles, Todor Jakovlevski deklaroi se gruaja ka marrë lëndime në fytyrë dhe pas ndihmës së ofruar mjekësore është dërguar në Shkup, ndërsa dy burrat e lënduar kanë marrë fraktura, ndërsa njëri ka lëndime më të lehta.
Në aksidentin humbi jetën një djalosh 24-vjeçar.
Aksidenti ka ndodhur në orën 12.10 minuta kur automjeti “ford galaski” me targa të Velesit pa e respektuar sinjalistikën ka hyrë në hekurudhë.
Sipas informacioneve fillestare, të lënduarit kanë qenë pacientë të dializës të cilët duheshin të dërgohen në spital.
Nga Stacioni Hekurudhor i Velesit për KOHA deklaruan se trafiku hekurudhor është lëshuar për qarkullim pas ekspertizës së bërë nga na e policisë.
