Nga Alfred PEZA
Kosova është bërë këtë javë një nga shtetet e Ballkanit që i është nënshtruar trysnisë për arrestimin dhe dorëzimin e atyre që Ankaraja i kërkon nën emërtimin “gulenistë”. Në rreth 20 muajt e fundit, Turqia ka arrestuar më shumë se 50 mijë veta në operacionet e saj brenda e jashtë vendit, kundër mbështetësve të dyshuar të Fethullah Gulenit, klerikut që akuzohet se qëndronte para grusht shtetit të korrikut të vitit 2016, kundër Presidentit Recep Tayyip Erdogan.
ÇFARË KA NDODHUR?
Gjashtë shtetas turq, pesë nga të cilët punonjës të Institucionit Arsimor “Gylistan” pronë e Gulen dhe një mjek, u deportuan të enjten e kësaj jave nga Kosova, në një operacion ende të pasqaruar të kryer nga shërbimet e zbulimit të të dyja vendeve. Të nesërmen Haradinaj, shkarkoi ministrin e Brendshëm Flamur Sefaj dhe shefin e Agjencisë së Zbulimit, Driton Gashi. Të shtunën mblodhi Këshillin e Sigurisë pas të cilit tha se ka kërkuar hetim dhe raportim nga institucionet e sigurisë dhe drejtësisë për këtë rast, duke shtuar se nuk ka qenë i informuar për veprimet e tyre.
Erdogan falënderoi të dielën Presidentin e Kosovës Thaçi dhe sulmoi sërish kryeministrin Haradinaj për qëndrimin e ndaj operacionit të deportimit të 6 shtetasve turq. Duke folur në kongresin e partisë së tij në Hatay në juglindje të Turqisë, ai tha se “e falënderoj Presidentin e Kosovës. Por kryeministrit i them ‘turp’. Sepse largimi nga detyra i kreut të zbulimit dhe ministrit të Brendshëm, të cilët na i dorëzuan anëtarët e organizatës terroriste FETO, është një gabim historik. Ato e bënë detyrën e tyre”.
Një ditë përpara kësaj, të shtunën, Erdogan tha në një takim të Partisë Zhvillim e Drejtësi në Stamboll se ishte “i mërzitur”: “Unë tani pyes kryeministrin e Kosovës: Me udhëzim të kujt more një hap të tillë? Prej kur fillove t’i mbrosh ata që u përpoqën t’i bëjnë grusht shteti Republikës së Turqisë?” Kryeministri i Kosovës Ramush Haradinaj, nuk ka reaguar as herën e parë e as herën e dytë ndaj sulmit të Erdogan. Presidenti Thaçi, ka deklaruar se është njoftuar pas operacionit dhe kërkoi që të priten hetimet para se të bëhen vlerësimet për të.
BE RRI E VËSHTRON!
Mediat e ndryshme ndërkombëtare po e shohin këtë lëvizje më me shqetësim. Ndërsa mediat shqiptare, çuditërisht, vazhdojnë ti kushtojnë më shumë rëndësi “cic- mice”-eve të ditës dhe lojërave të liderëve politikë, sesa zhvillimeve kaq thelbësore për të sotmen dhe të ardhmen e Kosovës dhe faktorit shqiptar në Ballkan.
Sipas televizionit publik zviceran SFR “në Ballkan po ndodhin lëvizje të mëdha gjeopolitike, ndërmjet dy fuqive me ndikim; Turqisë së Erdogan dhe Rusisë së Putin.” Sipas analistit Georg Hasler, “loja po bëhet tejet e rrezikshme, kur kihet parasysh se BE është fare e pafuqishme karshi këtyre ndikimeve”.
Kritikat e liderëve të 6 vendeve të Ballkanit Perëndimor kundër Brukselit zyrtar, se po vonon shumë më tepër se duhet hedhjen e hapave për procesin e anëtarësimeve të reja, janë marrë më shumë si një formë e rafinuar presioni për të marrë dhurata të pamerituara, sesa një realitet që po lëviz më shpejt sesa burokracia olimpike e BE.
A JETOJMË NË REALITETIN E PARA 150 VITEVE?
Kur e dëgjon këtë përplasje mes Presidentit të një republike si ajo e Turqisë me Kryeministrin e një shteti që më 17 shkurt të këtij viti festoi 10 vjetorin e pavarësisë, për një moment “të prishet filmi” dhe si pa dashje mund ta kapësh veten duke menduar me zë të lartë: A jetojmë në realitetin e vitit 2018, apo në atë të 150 viteve më parë?
A po jetojmë në shekullin e XXI, apo në vitin e 68 të shekullit XIX? Atëherë kur u bë ndarja e re administrative e Perandorisë Osmane dhe u krijua ai që fillimisht u njoh si Vilajeti i Prizrenit, e që më pas në vitin 1877, mori emrin Vilajeti i Kosovës.
A po flasim për një Republikë të themeluar nga perëndimi pas luftës së NATO-s mbi ish Jugosllavinë e mbetur të Sllobodan Millosheviçit, e që ka për President ish luftëtarët e UÇK Hashim Thaçi e për Kryeministër Ramush Haradinajn? Apo jemi në një Vilajet që kishte për Vali të parë, Halil Rifat Pashën.
A jemi në Republikën e re që kufizohet me republikat e Shqipërisë, Maqedonisë, Serbisë e Malit të Zi? Apo jemi në Vilajetin e vjetër që kufizohej në lindje me Bullgarinë, në perëndim me Vilajetin e Shkodrës, Malin e Zi dhe Bosnjën e Hercegovinën, në veri me Serbinë dhe në jug me Vilajetin e Manastirit dhe atë të Selanikut?
Sa më shpejt që të na e sqarojnë këtë vetë liderët legjitimë të Republikës së Kosovës, aq më mirë do të jetë për ta, për Shqipërinë dhe gjithë shqiptarët në Ballkan. E mbi të gjitha, aq më mirë do të jetë kjo, edhe për Turqinë e Erdoganit vetë.
