Kovaçevski pas dorëheqjes: Sërish do të jem kryeministër!

Dimitar Kovaçevski dorëzoi dorëheqjen nga posti i kryeministrit në Kuvend. Sipas njoftimit të kryetarit të Kuvendit Talat Xhaferi, dorëheqjet e Kovaçevskit dhe kryetarit të Kuvendit duhet të konstatohen në seancën e nesërme të Kuvendit. Me dorëheqjen e Kovaçevskit e gjithë qeveria ka dhënë dorëheqje. Kovaçevski do të mbajë postin e kryeministrit deri në zgjedhjen e qeverisë teknike të dielën, më 28 janar.
“Talat Xhaferi ka përvojë në drejtimin e parlamentit, unë kam ardhur me një përvojë tjetër, në drejtimin e korporatave dhe ne kemi një stil tjetër si politikanë, por shteti me siguri do të mbajë të njëjtin drejtim, orientimin properëndimor dhe synimet strategjike. Qeveria teknike do të kujdeset mirë për qytetarët. Kjo është diçka që është e paraparë me ligj, ndërsa më 9 maj Qeveria e re do të udhëhiqet nga unë dhe koalicioni që do ta çojë Maqedoninë në BE deri në vitin 2030 – tha Kovaçevski. /SHENJA/