Abdulla Mehmeti
Ata që nuk e njehin përbërjen e një produkti dhe procesin e prodhimit të tij nuk mund ta vlerësojnë cilësinë e tij dhe t’ia caktojnë çmimin.
Ngjashëm, një politikan nuk mund të jetë i suksesshëm në rrethanat aktuale, nëse nuk e ka përjetuar në lëkurën e tij, dhunën, diskriminimin, përbuzjen dhe terrorin e sunduesit; nëse kjo ndjenjë nuk ia ka përshkuar trupin, ndjenjat dhe shpirtin; nuk e ka prekur në lëkurë, në eshtra e damarë, në çdo qelizë të trupit të tij dhe të ketë mbetur edhe më tej i palëkundur, i pathyeshëm, veprues dhe kryengritës.
Shqiptarët në Maqedoni nuk mund t’ia lejojnë vetvetes komoditetin të udhëhiqen nga politikanë që u vjen era „cips“ dhe „eurocrem“!
Do të vinë kohëra më të qeta kur edhe ky tip i politikanëve nuk do ta kenë vështirë të udhëheqin, por aktualisht ata janë të mirë vetëm si votues dhe pjesë e publikut, jo në ballë të proceseve.
Kur godasin furtuna të mëdha, vetëm pak burra dhe strategë mund t’u dalin përballë, jo edhe çilimitë dhe të pazotët që nuk e dinë veten sa peshojnë dhe cila është forca goditëse e furtunave përballë tyre.
(1.VI.2017)