Ohri dhe Struga janë më të frekuentuar me pushues për festat e Ilindenit. Hotelet dhe ambientet private të akomodimit janë të mbushura me të gjitha kapacitetet, kryesisht me mysafirë vendas, por ka edhe turistë të huaj holandezë dhe polakë. Shoqata e Hoteleve (HOTAM) thotë se në dhjetë ditët e ardhshme nuk ka vend për rezervim transmeton Strugalajm.com.
“Deri më 10 gusht është plot në Ohër dhe Strugë. Për momentin ka të ftuar vendas dhe të huaj. Holandezët dhe polakët i përmbushin kontratat në maksimum”, thotë Krste Blazevski, presidenti i HOTAM.
Pronarët privatë thonë se çdo vit në këtë periudhë nuk ka vend të lirë me qira sepse atëherë janë mbajtur koncerte të ndryshme.
“Për periudhën 28 korrik deri më 15 gusht ne kishim bërë rezervime tashmë një muaj më parë. Vijnë kryesisht të rinj, të cilët në atë periudhë shkojnë në koncerte”, thotë Vesna Blažeska, një pronare private.
Ka gjallëri në pazar, kafene dhe plazhe, duke rikthyer kështu imazhin e dy viteve më parë kur këto qendra turistike ishin nga më atraktive për pushime.
“Situata është si në kohët e mira. “Kemi filluar të funksionojmë normalisht”, thonë hotelierët.
Për shkak të frekuentimit do të forcohen edhe kontrollet policore. Policia apelon tek vozitësit që të kenë kujdes sidomos kur vijnë në Ohër dhe Strugë, sepse rruga nga Kërçova është ende në ndërtim e sipër.
“Jo vetëm drejt vendeve turistike, por edhe në zonën qendrore të qytetit dhe në periferi, do të vendosen pika të përforcuara të trafikut, për të ruajtur stabilitetin e trafikut dhe rregullin e trafikut në nivel të jashtëzakonshëm”, thotë Stefan Dimoski, zëdhënës i SPB-Ohër.
