Një ngjarje e rëndë është raportuar ditën e sotme nga mediat gjermane, ku një burrë me origjinë nga Kosova ka vrarë gruan, vajzën 17 vjeçe dhe më pas veten.
Zyra e Prokurorit Publik në Munster, Gjermani, ka njoftuar se një 51-vjeçar në Isselburg në Qarkun Borken, besohet të ketë vrarë gruan, një nga vajzat dhe më pas edhe veten.
Ngjarja e rëndë raportohet të ketë ndodhur mëngjesin e të enjtes.
“Ai i kishte treguar një të afërmeje për krimin këtë mëngjes, e cila më pas e ka kontaktuar policinë”, ka thënë kryeprokurori Martin Botzenhardt, raporton ‘ëdr.de.
Policia gjeti trupin e gruas 46-vjeçare dhe të vajzës 17-vjeçare në shtëpi.
“Vajza tjetër 14-vjeçare u gjet e paprekur fizikisht në shtëpi. Ajo është marrë nën kujdes dhe po i jepet kujdesi mjekësor”, deklaroi Botzenhardt.
Sipas shikimit të vendit të ngjarjes, hetuesit supozojnë se 51-vjeçari së pari ka vrarë gruan e tij, më pas vajzën dhe në fund i ka dhënë fund edhe vetës.
“Sipas gjetjeve fillestare, burri 51-vjeç ka dashur ta vriste gruan e tij dhe dy vajzat”, tha kryeprokurori Martin Botzenhardt.
Mësohet se vajza e mbijetuar ishte gjetur nga shërbimet emergjente e ngujuar në një dhomë, shkruan Zëri.
“Edhe pse babai pretendohet ta ketë kërcënuar edhe atë me vdekje, ai nuk e ka zbatuar planin”, tha kryeprokurori.
