Kryeministri Zoran Zaev pret që koalicioni qeveritar të mbijetojë edhe pas zgjedhjeve lokale, ndërsa shumica parlamentare të mbetet stabile dhe të rritet. Ai shton se është i hapur për bashkëpunim me të gjithë, përfshirë edhe individë të opozitares VMRO-DPMNE në interes të qytetarëve dhe shtetit. “Vazhdojmë bashkë me BDI-në, mbështesim kandidatët e BDI-së dhe besoj se ky do të jetë kontributi i qytetarëve në Maqedoni”, ka thënë Zaev gjatë vizitës në Draçevë, transmeton Medial.mk. Për koalicionimin e ASH-së me BESËN për rrethin e dytë dhe nëse ky rigrupim nënkupton edhe dalje nga qeveria pas 29 tetorit, Zaev ka thënë se është e drejtë legjitime pasi ka kundërkandidat nga BDI në Gostivar dhe Strugë. Megjithatë është e drejtë e Aleancës sesi do të vendosin. Unë pres që koalicioni qeveritar të mbijetojë dhe të forcohet në periudhën që vijon. Por jam i bindur se shumica parlamentare është stabile dhe ajo do rritet”, ka thënë Zaev. Ai ka shtuar se me PDSH-në nuk ka pasur takim me liderin e asaj partie Menduh Thaçi për koalicionim për shumicë të re parlamentare apo pjesëmarrje në qeveri.
