Presidenti Donald Trump, i cili doli pozitiv me koronavirus të premten në mëngjes, po largohet nga Shtëpia e Bardhë për në Qendrën Mjekësore Ushtarake Walter Reed.
Mësohet se Trump do të qëndrojë në këtë qendër për disa ditë, ku Shtëpia e Bardhë njofton se do ti nënshtrohet disa testeve.
Trump është trajtuar për COVID-19 me një ‘koktej’ antitrupash të prodhuar nga Regeneron.
Mjeku i tij njoftoi të premten, se Trump është ‘i lodhur’ por në humor të mirë, ashtu si edhe Zonja e Parë, Melania Trump.
“Presidenti Trump mbetet në gjendje të mirë, ka simptoma të lehta dhe ka punuar gjatë gjithë ditës,”- tha sekretari i shtypit Kayleigh McEnany në një deklaratë.
‘Me rekomandimin e mjekut të tij dhe ekspertëve mjekësorë, Presidenti do të punojë nga zyrat presidenciale në Walter Reed për ditët e ardhshme.
“Presidenti Trump vlerëson mbështetjen e madhe për të dhe për Zonjën e Parë,” shtoi gjithashtu McEnany.
Trump dhe Melania njoftuan se ishin testuar dhe kishin rezultuar pozitiv me koronavirus në orët e para të mëngjesit të së premtes, disa orë pasi ai u kthye nga një fushatë për mbledhjen e fondeve në klubin e tij të golfit në New Jersey, ku ai besohet të ketë rënë në kontakt me të paktën 100 persona.
Ai mblodhi 5 milion dollarë për fushatën e tij, e cila tani ka anuluar të gjitha ngjarjet e ardhshme në pritje të diagnozës së presidentit.
Të premten pasdite, mjeku i Trump lëshoi ??një deklaratë duke thënë se ai ishte ‘infuzionuar’ me antitrupa – të cilat dihet se ndihmojnë pacientët me COVID me qëllim që të shërohen sa më shpejt ‘pa incidente’.
Atij gjithashtu i është dhënë zink, vitaminë D, famotidinë, melatonin dhe një aspirinë ditore.
NBC citon burime të paidentifikuara të cilët thonë se Presidenti gjithashtu ka një ethe të ulët.
Melania vuan nga një ‘kollë e lehtë dhe dhimbje koke’.
Trump nuk ka postuar në Twitter që nga ora 1 e mëngjesit të së premtes kur zbuloi diagnozën dhe u pa për herë të fundit personalisht të enjten në mbrëmje, duke u kthyer nga mbledhja e fondeve.
Ai duhej të merrte pjesë në një thirrje konference me guvernatorët në 12.15 pasdite por u zëvendësua nga Zv/Presidenti Mike Pence, i cili ka dalë negativ.
