Në këtë ditë të fundit të 2017-ës, kryeministri Edi Rama ka veshur kostumin e babagjyshit dhe ka bërë të lumtur një fëmijë dhe një vajzë 26-vjecare.
Kreu i qeverisë është bërë pjesë e emisionit “Një mesazh për ty” në “E diela shqiptare” të moderuar ng Ardit Gjebrea. Aty u bënë publike dy histori mjaft të dhimbshme, ajo e Leos 9-vjecar dhe e Erglisës 26-vjecare nga komuniteti egjiptian.
Ajo ka mbaruar studimet e larta për mësuesi ndërsa ishte aty për të treguar vuajtjet e familjes së saj, por edhe të fëmijëve të këtij komuniteti, problemet e të cilëve i ka prekur nga afër si mësuese. Historia e saj është dëgjuar në prapaskenë nga kryeministri Edi Rama, pa dijeninë e saj.
Ndërsa Leo 9-vjecar është një djalë i cili ka lindur me një defekt në kocka, dhe për vite me radhë i është nënshtruar operacioneve të ndryshme. Edhe pse mjekët janë shpresëplotë se Leo do të ecë, kjo ditë po vonon.
Nëna e Leos ka treguar historinë e saj dhe të djalit të vogël, ku ka bërë apel për ndihmë.
Ajo çka ka prekur të gjithë, ishte letra që Leo i ka shkruar këtë fundvit Babagjyshit të Vitit të Ri. Mes rreshtave, shihet dëshira e djalit për t’u shëruar, për të studiuar dhe për t’u bërë dikush në të ardhmen.
Dhe kjo letër ka prekur edhe kryeministrin Edi Rama, i cili nuk ka mundur t’i mbajë lotët teksa ka ndjekur live gjithë rrëfimin.
Leo, teksa ka hyrë në studio në karrocë me rrota, është shprehur se nga Babagjyshi pret këtë vit një makinë me të cilën të mund të shkojë në shkollë, dhe një kukull për motrën e tij.
Fill pas këtij momenti, në studio ka hyrë kryeministri Rama i veshur si Babagjyshi i Vitit të Ri dhe i ka bërë surprizën e veçantë, duke ia realizuar dëshirat. Ai premtoi se një taksi do ta presë çdo mëngjes poshtë shtëpisë për ta marrë edhe në përfundim të mësimit, ndërsa I dhuroi edhe një thes me lodra fëmijësh.
Ndërkohë 26-vjecarja nga komuniteti rom mori lajmin më të rëndësishëm në jetën e saj. Ajo do të jetë këshilltare e ministrit për çështjet Sociale. Me frikën se nuk ka eksperiencën e duhur, vajza u duk shumë skeptike nëse kjo do të ishte e vërtetë, por teksa pa përlotjen e saj, kryeministri ju drejtua me këto fjalë: “T’i japësh ministrit mend nga zemra jote. Ke eksperiencën e zemrës të luftës me varfërinë” .
