Mijëra copë të gazetës KOHA, e numrit të së premtes, nesër do shpërndahen falas në qytetin e Kërçovës. Ky vendim i redaksisë së gazetës ka ardhur pasi të premten, në orët e hershme të mëngjesit, një “blerës” anonim, ka grumbulluar të gjitha numrat e sotëm të gazetës KOHA, pas shkrimit në ballinë me titull “ART TETOVË, shoqata fantazmë që merr mbi 2.4 milionë”, shkrim në të cilin bëhet fjalë për Shoqatën e Artistëve Shqiptarë – Art Tetovë, ndërsa ka fituar tre projekte me shifra të mëdha financiare nga Programi vjetor i Ministrisë së Kulturës. Bëhet fjalë për shoqatën Art Tetovë, me themelues personin Kujtim Saliu nga Kërçova, ndërsa me seli në një banesë në rrugën “180” në Tetovë, por që nuk ka ndonjë shënim apo diçka të ngjashme se në këtë banesë, zhvillohen aktivitete kulturore. Qytetarë të shumtë të Kërçovës, të habitur me mungesën e gazetës KOHA, kanë marrë përgjigje nga kiosqet e qytetit se një person, që herët në mëngjes ka grumbulluar gazetat, ndërsa nuk ka dhënë sqarime se për çfarë, mijëra gazeta të sotme të KOHËS i blen apo edhe se ku do t’i çojë! “Dikush ka porositur që skandali me qytetarin e Kërçovës që ka marrë 2.4 milionë denarë për tre projekte dhe me shoqatë famoze, të mos përhapet edhe në Kërçovë. Megjithatë, e dimë se kush qëndron mbrapa këtij skandali…”, thonë disa qytetarë të Kërçovës. Me këtë rast, bashkë me numrin e nesërm (datë 17 shkurt), lexuesit e gazetës KOHA nga Kërçova mund ta marrin edhe gazetën e së premtes, falas.
