Prof. Dr. Ferat Polisin:I përgëzoi studentët për vendin e parë në garat ndëruniversitare (FOTO

Në garat ndëruniversitare, të cilat u organizuan në Universitetin “Goce Dellçev” në Shtip, me mbështetje të OSBE-së, për nder të Ditës Ndërkombëtare për të Drejtat e Njeriut, me pjesëmarrjen e studentëve nga pesë fakultete juridike të universiteteve publike dhe private nga Maqedonia, studentët e Fakultetit Juridik të Universitetit të Tetovës e fituan vendin e parë.

Profesoresha Doc. Dr. Arta Bilalli Zendeli, e cila ka qenë edhe mentore e grupit të studentëve tha se në këto gara, studentët e Fakultetit Juridik, kanë punuar në maksimum, që gjykimi simulues i tyre të vlerësohet me notë maksimale. Ajo falënderoi edhe Doc. Dr. Qebir Avziun për mbështetjen që u ka dhënë studentëve në këto gara. “Me rastin e Ditës Ndërkombëtare për të Drejtat e Njeriut, tani më tri vite me radhë, në Shtip, organizohet një manifestim i tillë ndërmjet studentëve. Viti i parë nuk ka qenë me karakter garues, ndërsa dy vitet e fundit po. Në këtë manifestim marrin pjesë studentë nga fakultetet juridike të pesë universitete të ndryshme të vendit, si: Universiteti i Tetovës, Universiteti i Shkupit, Universiteti i Manastirit, Universiteti i Shtipit dhe Universiteti i Evropës Juglindore. Në këto gara, studentët garojnë mes veti për të marrë çmimin e parë përmes një gjykimi të simuluar, i cili vendoset në bazë të zgjidhjes së rastit. Ne si mentorë, studentëve ua zgjedhim një rast dhe pastaj e simulojmë në bazë të aktit aktgjykues të cilin e marrim. Studentët në këtë simulim u vlerësuan me notë maksimale – dhjetë nga komisioni vlerësues i përbërë nga gjykatës të gjykatave të Shkupit, Shtipit dhe Velesit, tha Doc. Dr. Arta Bilalli Zendeli.

Në këto gara, studentja e studimeve master në Fakultetin Juridik, Kaltrina Emro, u zgjodh si gjykatësja më e mirë, ndërsa edhe studentët e tjerë të grupit u vlerësuan maksimalisht për paraqitjet e tyre. Studentët pjesëmarrës në këto gara, sot realizuan një takim edhe me Dekanin e Fakultetit Juridik, Prof. Dr. Ferat Polisin. Ai i falënderoi dhe i përgëzoi studentët për këtë arritje duke thënë se ky sukses ka ardhur falë punës, angazhimit dhe bashkëpunimit korrekt dhe të mirëfilltë mes profesorëve dhe studentëve.